الوان غبية

واقفة ...
علي منبر غيابك
لغة الحضور
تفتح بيبان اللقا
واحة تأمل...
للوجـــع
.. .. ..
العشق راهب
بيحف روح المسا
وأنت ف براح ..
دهشتي
بتخطي بوحك ع الهروب
الصمت كان حجتك
الصمت كان محنتي
خششتي قلبك للخفا
ووهبتي روحك للجفا
رغبة وممات
شديت بروج الوشوشة
هج الربيع
سلم مواسمي للعطن
.. ..
نبضة إيديا المكفوفين
ناقلين شعورهم
ع السكك
الوان غبية
وضحكة غابت وانطفت
.. .. ..
الصبح هلل للرجوع
والشمس شطت واختفت
القلب لـَيل
صلي صلاة الاستخارة
وامتزج بالطين

خيال مقآته

حلمي القزاز
اتقطع واترف
الكف طبطب
فوق هدوم الطفل رف
شكلت بعضي
من جمود اللعبة رف
الطرف سالب
قلبي موجب واللا سالب
واللا طرف النخل ميت
من سقوط العرض فوق الأرض
فرض الصبح جف
..... .....
الحبر طرطش ع الهدوم
الشمس لسعت لما مشيت
جوا ريق الجلد قزقز ف الرديم
شيطان رجيم
لازق ف عرقوبي المشقق م الروتين
الكل هج
نبوت عجين الليل مقطع ..
ع المخيخ
وخيال مقأته جوا مني ينز شيخ
وأنا لسه عيل
جوا جرن القمح خايف م الدريس
عديت هويس العمر قشعر جثتي
اتنين عساكر
مسكوا عب الصبح
ولو ع الطريق
الوان وشوش الخلق ..
نزلت ع الهدوم
اتوسخوا
فنفضت جيبي
من صليل القلب جوا المحفضة
فرضي انقضي
والشمس طلعت من كفوفي
تستغيث
مفرود حصير الروح بتنده
ع البوليس
أغراب ف قلبي استوطنوا
الكلب شمشم جوا مني وملقنيش
أنا روحت فين
أنا كـنت فين
أنا مستخبي جوا عبي
الليل بيسرق ف السنين
والضهر محني م المخاض
..... .....
حلمي القزاز
عضعض طراطيف الصوابع ..
لما شدوا الجلد
من جسمي المبعتر ع التراب
الصبح غاب
ودعت روحي
وابتديتني
من جديد

شطين براح

إخلع حذاءك
خشني بشويش
إفرد تراويحك بين ضلوعي
الضفتين
إرفع أدانك للمدي
قيم الصــلا
اللـ ـ ـ ـ ـ ـ ـه
صوتك بلالي ف ندهتك
لونك غويط
سرياني طعمك لهجتك
طبش ف دمي بغنوتك
إفرش نخيلي ف سحنتك
شطين براح
لم الستاير م الهوي
طوح ف قلبي النخلتين
يخرج أنا
من بين ضلوعك أنبيا
تنهجلي نهجك دعـوتك
زي النسيم ماتحفنيش
طب ليه يعيش
جواي نبضك طلعتك
وأنت اللي عاشق خلوتك
طيري الجريح
رفرف ألم
جواي كاتب بالندم
متصدنيش
لحظة ميلادي ف مسجدك
إفرد دراعك ضمني
غصنين زتـون
بينهم حمامة مسلمة
أمر الوطــن
للـ ـ ـه

وبندهلك

أنا حزنكِ
أنا عيدكِ
أنا فاتحة كتاب روحكِ
وبعد السجدة تشهيدكِ
أنا المشنوق بحبل الفرقة
بندهلكِ
امد الصوت بتنهيدة
بتغريدة
لا باللقالي صدي للصوت
ولا كبتي بتجوفي
وأنا ف الغربة كان شاغلكِ
وبكتبلك غناي بدموع
وبرسملك أمل ورجوع
وبضحكلك وأنا الموجوع
بعصيانكِ
بنسيانكِ
لقلب خلاص بقي نبضه
علامة ف دم شريانكِ
وبندهلكِ
وأمد الندهه تبكيكي
تضمي الشمس وتغيبي
ينط القلب من عبي
يناديكي
أنا بيكي
يلاقيكي
قساوة قلب مايلبي
وبندهلكِ
وبندهلي
الم صباي من كهلي
اسيب الوعر ف خطاكِ
واكون سهلي
الاقي الدنيا منقوشة
ف عز القهرمفروشة
بلون .. طهري
وأنا جواكِ بندهلي

طلاسم عشق فرعوني

أتوحد
وأخش القوس
احاوطني بتوب الصبر أيوبي
يعندل حسك اللازق
علي الأسمنت اتمردغ
ف بركة دم متنتور علي الشخابيط
رضاب القلب يخضوضل
والأقيكي
طلاسم عشق فرعوني
بتتعبد
لخيط أسود من الدخان
أسيب الشمس ع الغارب
تشق ف قلبك الطوبى
منافذ بوح
تقاوي الأرض تتشرنق
علي الجدران
أصر اللهجة ف جرابي
أخط الروح
شراقي الأرض تلفظني
تدلدلني
من الزقزاق
يشخب قلبي ع الصفحة
ويمحي السطر
أتمطوح مع المجهول
الأقي الغد قدامي
شوارع ناهشة سترتها
سلاسل خوف
أسك بضهري للناصية
تباغتني
صهارج دم شرياني ...
من الممزوج بروح الجان
أكلفتني
بتوب مطروز من الخردل
أحاوطني
بأية الكرسي وارجعلك
بدون أطراف

شجرة تين

الناصية بتاكل بني آدمين
والصبح بيطلع م الإسفلت
مقطع توبه
بيشحت شمس
أتقصقص من طراطيف وأنهض
قلبك ينفض
كل خيوط الفجر ف جسمي
أدحرج من أنفاسي أتكهرب
وأهـرب
م السجاديد الطاوية الحلم الأخضر
ف الشراشيب
نبضك يزحف ع الناموسية
الصدر يضيق
يتكرفس جوا عيونك
شجر التين
يتشخبط لون الصبح بلون الليل
أتمد بطولك

ع القصاقيص السايرة ..
ف خط بياني م الشريان
أتشعوذ جوا وريدك بيت م الشعر
أتكهرب
لما النبض الراقص
يلمس حد الطمث ف ذاتك
أهـرب
وأسكن جوا ف لعب الطفل
الميت م التنطيط

رعشة موت

أبجد هوز
بـوز وش الكون ف قفاي
أنا كنت معاي
جواي براي
ملبوس ف كابوس
مدسوس النبض ف صمت الحيط
محدوف الأمس ف شمس الغيط
مروية وشوش الخلق بمية نار
الكتمة الخوف
العتمة الجوف
بيشدوا حروف
إنسان محذوف
م لوحة كون مدعوك بزعاق مكتوم
متبعتر منك فيك جواك
بيمد تابوت
إنسان بيموت
والكون مقلوب
معجون ملتوت ف عروق الطين
مفتوت الدم ف لقمة عيش
بيعيش الأمس الهمس اللمس
ف دبحة زور مخنوق
مدلوق الحس ف حبل الصوت
يتمد الحلم ف علم الغيب
يتشد الفيلم ف كاميرا .. فلاش
ملقاش جواك غير رعشة كون
بيموت ف تابوت
تنقلب الصورة
وتوت
توت

لحظة ميلاد

ومقسمة
جثث الميلاد نبضي / الغبي
مادد/ ايدين الشرنقة
سطر/ الورق
مرمي / القلق
لحظة شرود الأسئلة
ابن المسافة / محتضر
نبض / الكناري / زقزقة
باشت / سنان بق / الألم
دفتر / غياب /المدرسة
زحمة / عيون الخلق
ع البنت/ الوطن
شد / الكفن
حبلت / عفن
تخت الفصول الضيقة
صيفك / شتا
طيـفك / ارق
كشكش دروب المفترق
لفتني شمس / الأحتضار
بيت / العيال
لحظة بكور البنت باش
وش / الخريف
زعقة /طيور / الأندهاش
الــدم / مل
النبض / مل
القلـب / مل
الجسم / مل
الطـفل / مل
الطـفل / مات
لحظة دخول الأمتحان